絲絲講場：梁定邦呻港交所失息
港股呢排成交靜到拍烏蠅，唔少經紀同絲絲呻話返工簡直悶到要瞌眼瞓，連帶港交所（00388）股價都受累一蹶不振。證監會前主席梁定邦，雖然退出金融市場都好一段日子，但一提起港交所，都顯得有啲咬牙切齒。
籲李小加幫股東搵錢
原來梁定邦都係港交所小股東之一，揸咗幾千股。佢笑言對港交所近年嘅股價同埋派息係咁跌，唔係好happy（開心）。佢話自己卸任證監會主席咁耐，都唔係太留意近年港交所嘅變化，仲話同港交所李小加總裁唔係好熟，「我唔理李小加做乜，最緊要佢快啲幫股東搵番多啲錢！」
其實呢個可能都係全城港交所小股東嘅願望，港交所曾經升到二百幾蚊，令散戶如癡如醉，如今股價卻長期落後。港交所就嚟公布中期業績，雖然上半年成交平均都唔錯，但股價就係升唔到。睇嚟，大家都不要寄予厚望！
北京有屋 老友多巨星
講番梁定邦，雖然佢冇做中證監全職顧問，但依家仲係中證監國際顧問委員會委員之一，閒時也會到內地講吓課，所以一年都有唔少時間喺北京住。佢喺北京有屋，返到北京屋企，自然會相約見吓啲老朋友，好似周小川、郭樹清等，仲有前總理朱鎔基添。佢仲話朱鎔基籌備緊回憶錄，希望幫佢本回憶錄英文譯本做文字潤飾。咁梁定邦係大律師，英文根柢厲害，有佢「執靚」本書，肯定大有睇頭！
余詩韻