孖妹S檔案︰科網科技兩套炒法

王：易方投資董事總經理兼投資總監 王華

科技股要拆開條數計

高妹：其實科技股同科網股就如孖生兄弟，好難分辨兩兄弟樣貌（基本因素、特質）有咩唔同喎？

王：投資係一件十分嚴謹嘅事，關乎你贏錢定輸錢，其實除非散戶對科技股擁有專業知識，否則輸錢機率甚高，原因是科技股嘅產業鏈非常廣泛，從產品設計、製造、零部件、組裝、維修等，涵蓋不同類型電子業嘅專業知識及技術，亦即其背後牽涉不少生產廠家，令行業門檻提高。相反，科網股行業門檻就較低，只要設計好一個網站或網頁，基本上已經可以接觸群眾，開發成本較低，產品買賣亦唔需要大量人力及物流。另一重點是，科技股嘅產出涉及實質產品如手機、電視機、電腦等，但科網股傾向夢想主義，產品存在於虛無飄渺嘅互聯網空間，若單靠用戶數量去量化回報，其實十分困難。

彩兒：王Sir，不如舉兩個例子解釋吓，好嗎？

王：每當我研究科技股，我都會將自己變做一個法醫官，除咗仔細解剖一間公司嘅基本因素，仲會拆開其產品去進行深度分析。舉例蘋果公司（AAPL）嘅iPhone，拆開機身後會發現涉及好多電子晶片同配件，呢度就涉及十多間廠商，如果呢十多間廠商都係上市公司，即代表潛在投資機會多達十個或以上，而並非散戶炒來炒去嘅富智康（02038）或瑞聲科技（02018）。至於科網股就可以用Facebook（FB）做例子，一個由軟件設計而成嘅社交網站，就係因為全球用戶量急升，於是就挾着高PE（市盈率）集資並且成功上市！但大家深入去思考，其實Facebook有咩實質業務？有咩實質產品？

高妹：可惜散戶炒股，多數追求「外表」（股價），好少睇「內在美」（基本因素）呢！

王：我着重「內在美」，但同樣追求「外表」嘅！因為兩者有莫大關係，須知道科技產品質素優良係能夠確保佢嘅銷量數字，而且科技股嘅生意擴張性好大，只要一個產品「idea」（意念）成功，其延伸性就可以好長，而且其回報係可以量化的。舉例，一部智能手機嘅設計成功後，其每年全球出貨量可以高達數千萬部，而每賣出一部智能手機，其收益都可以入帳，有數得計。雖然科網股嘅延伸性亦好大，但其生意擴張性就比較難計算，因為我哋較難去量化每個用戶能夠為公司帶來幾多實質收益。

科網股講夢想 波幅勁

彩兒：學嘢要學重點，即係散戶可以點炒科技股同科網股呀？

王：炒賣科技股係有迹可尋，如透過生產零部件嘅公司變化及產品銷量，繼而推測未來股價升跌幅；但科網股就較為虛無，其股價突然急升或急跌可以話係「無譜」，原因係只要好消息出現，散戶就把未來賺錢預期立即注入股份現價，導致科網股嘅價格爆炸力顯得驚人，但往往忽略考慮其基本因素或隱憂。講笑咁講，科網股有少少似賭大細，業務唔需要具體，只要有「夢想」可預期，PE可以由10倍爆升至100倍，所以如果散戶識得心理學，即捉摸賭大細嘅趨勢，投資贏面應該好大；相反科技股有實質業務及財務數據，散戶要贏錢就必須深入了解科技行業知識及技術。

贏到錢原因得三個

高妹：雖然科技股及科網股只有一字之差，但兩者都有個共同點：就係股票好難炒、錢好難贏囉！

王：唔係你以為投資話咁易喎？喺投資世界內，散戶永遠要撫心自問：「點解自己炒股票會贏錢？」而我認為原因有三個：（一）你睇到別人睇唔到嘅嘢；（二）你諗到別人諗唔到嘅嘢；（三）你做到別人做唔到嘅嘢。基於以上三個因素，你就會搵到自己嘅投資優勢，因為有超過80%嘅散戶都會犯下無知、唔做功課、唔肯止蝕等投資毛病。如果你要成為贏家，咁就要做市場領先者，發掘股市場上嘅錯配，即公司資產質素與股價不符的股票，然後採取買入或沽空策略。

彩兒：難怪投資市場上永遠都係贏家少，輸家多喇！

王：投資其實就係拆局，只要搵出一間公司嘅轉捩點，你就有成為贏家嘅機會。若從股票的板塊出發，你要搵一些股價持續向上或向下嘅主題板塊，繼而決定買入或沽空；若從個別公司出發，則要搵啲真實價值未反映現時股價嘅公司。另外，大家亦唔好以為壞公司就唔使睇，我就會長期追蹤壞公司，等待機會來臨就沽空佢嘛，一樣有利可圖！

王華小檔案

學歷︰香港大學工業工程系學士

現職︰易方投資董事總經理兼投資總監

工作經驗︰曾任多間半導體晶片公司擔任管理職位，及後轉戰法國巴黎證券（亞洲）股票研究部擔任科技股分析員

高妹、彩兒

若有料報畀高妹同彩兒或有嘢問，可電郵money.biz@opg.com.hk