「秋官效應」香港股民聽得多，即係話每逢有秋官嘅電視劇集上映，港股就會下跌，幾乎萬試萬靈。之不過，絲絲發覺，原來日本都有類似嘅現象，仲同動畫大師宮崎駿有關添。
話說港人熟悉嘅吉卜力工作室一系列動畫電影如《千與千尋》同《龍貓》，對日本投資者嚟講有另一重意義，因為當地流傳電視台播放這些動畫，如撞正美國公布就業數據，就會引發日圓上升及股市下跌，被稱為「吉卜力效應」。
原來，日本NTV電視台每隔一排就會喺星期五晚上嘅黃金時段播放宮崎駿動畫，好似尋晚就重播經典之作《天空之城》，咁啱美國公布非農業職位數據。回顧過去九次同樣情況下，有八次數據都未如理想，當中七次出現不利股民的市場波動。
以一一年七月為例，日本方面重播了《魔女宅急便》，期間美國公布嘅數據差強人意，導致美元兌日圓急跌1.2%，其後周一日股亦下挫0.7%。
據「吉卜力效應」信徒所講，NTV自一○年一月以來播放咗24次宮崎駿動畫，之後嘅日本交易時段圓匯上升比例達四分之三，日股亦有近半機會下跌。難怪尋晚《天空之城》重播前，網上已有唔少人討論，部分陰謀論者仲質疑，NTV係咪刻意喺美國公布就業數據時重播宮崎駿動畫。
雖然有人話係市場一廂情願將兩者扯上關係，但唔少日本散戶「寧可信其有」。
有即日鮮炒家仲話，佢幾年前喺電視台重播《天空之城》前平倉，結果成功避過美日股市大跌嘅一劫，避免損失數百萬日圓，之後喺周二重新入市，仲賺咗足足一百萬日圓咁多。哇，講到咁真，真係信不信由你。
余詩韻