雖然內地經濟增長放緩，唔少高端消費客都減少shopping、應酬，但中產階層就日益擴大。貿發局尋日就公布咗一個有關內地中產消費嘅調查，發現佢哋除咗繼續鍾情國際品牌，注重品質服務之外，理財投資嘅意識亦有所增強，識得未雨綢繆！報告仲話隨住社交網絡嘅興起，仲會影響到中產人士網上購物嘅意欲添！
貿發局指今次受訪嘅中產投資佔比有提升。結果顯示，有超過五成人認同「如果我有閒錢，我寧願將佢全部拎去投資」；六成四人更認同「花錢買商業保險係值得嘅，亦係對家人負責嘅表現」。
另外，有八成三人有網上購物嘅習慣，平均每月進行1.43次！貿發局大中華區高級經濟師黃醒彪解釋，互聯網上嘅貨品選擇多元化，而且有好多國內少見嘅海外品牌，吸引佢哋網上購物。
今次調查訪問咗1,600名內地中產，當中包括八個一線及三線城市，好似北京、上海、廣州、南京、常州咁，以個人及家庭月入作參考。