早排對沖基金經理阿克曼咪話美國健康食品直銷商康寶萊係「龐氏騙局」，沽空佢隻股票，同維權股東艾肯打對台，雙方爭持不下之際，有傳索羅斯基金入股康寶萊，仲係三大持倉之一，擺明係剃阿克曼眼眉。艾肯話唔肯定有冇咁嘅事，但有就最好喎，得戚到暈！
阿克曼呢？佢禮拜三不知幾淡定咁同CNBC記者講，佢10億美元嘅康寶萊短倉至今一股都未揸返，不過前日佢律師衝咗去叫美國證交會（SEC）查吓索羅斯有冇造市囉！鬼咩，有索羅斯咁嘅猛人撐腰，康寶萊前日最多升成10.7%，上到去66.5美元呀，枉阿克曼之前實牙實齒話人哋股價會跌到零，依家自己帳面蝕成3億美元啦，唔驚就假！
雖則索羅斯基金唔係由佢本人操盤，但絲絲心諗，會唔會係阿克曼三年前同傳媒晒命，話自己同索羅斯個個禮拜都會一齊打網球，讓佢老人家贏，之後得罪咗人唔知呢？
事關索羅斯早前曾經係阿克曼旗下主力基金Pershing Square嘅主要投資者，但今年年頭索羅斯就陸續對該基金贖回咗幾億美元，擺明唔多like啦。索羅斯曾經講過嘛，喺市場見到佢要小心，咪睇佢老，佢仲係一條鱷魚，因住食咗你！
絲絲覺得，阿克曼再咁搞真係有排蝕，因為Chapman Capital嘅舵手前日都出埋嚟唱好康寶萊，話佢市值低但賺到錢，現金流龐大，又走向國際，唔止會升到75美元，第日飆到300蚊都有份！
余詩韻