為咗要應付監管機構嚴格要求，滙控（00005）近年請咗唔少做過政府機構嘅高人，點知「你做初一，我做十五」，有位做過美國司法部副部長嘅獨立非執行董事，比美國總統奧巴馬「相中」，撬咗去做美國聯邦調查局（FBI）局長。
被撬走嘅高銘（James B Comey），今年三月先至加入滙控，擔任獨立非執董，個位都未坐暖就走人，去做FBI局長。滙控尋日出通告公布呢個消息，主席范智廉一方面恭喜佢得到美國政府賞識，另方面亦為損失一名良將而傷感。
高銘除咗擔任滙控獨立非執董之外，同時亦係金融系統風險防護委員會成員，協助提升滙控嘅合規水平。根據三月初嘅通告，高銘嘅任期原本係三年，去到一六年先至屆滿。高銘咁搶手，皆因佢資歷深厚。喺○三至○五年期間，佢擔任美國司法部副部長，同時係美國總統嘅企業詐騙專責小組主席。○二至○三年期間，佢出任美國紐約州南區司法總長，另外亦做過好多大公司嘅法律顧問，周身刀張張利，唔怪得連奧巴馬都要挖佢過檔啦。
余詩韻