期指觀瀾：今日策略順勢而為
基金月結日關係，臨收市前十五分鐘現貨成交急增，令到昨日港股主板成交條「大數」無咁難睇，有487億元，恒指由最多升117點到收市倒跌70點，報21,883點。在俗稱「超級星期四」，包括美、歐及英國央行議息，中國七月份製造PMI及長和系業績前，大戶酌量減磅合情合理。
事實上，恒指衝上0.618反彈阻力21,951點之後，恒指已是第七個交易日一直有波幅無突破，避免一旦掉頭炒落，低位有入市的基金，選擇月結日派番多少出街，可以理解。
八月期指報21,864點，成交得4.9萬張，比較特別係昨日四點左右，期指一度隊落21,794點，低水89點，現貨收市後才逐步收窄低水情況。今日影響大市的外在因素眾多，無論開邊面，筆者維持睇住現貨上破22,007點或者跌穿21,703點追勢。
睇見昨日八月恒指期權合約，認購最活躍的係22,600點，有1,048份合約成交，至於認沽，過千份成交則集中在20,800、21,000、21,200點，反而「平價」的21,800點認購及認沽交投唔算活躍，得185及546份，睇嚟超級星期四之前，大戶都博大霧，買遠期啲博破橫行區之後，有一個較大單邊浪推高指數引伸波幅。
John Mullen