絲絲講場：張耀堂捧「紅魔」親子
「紅魔」曼聯同傑志嘅賽事，本嚟係開心事，點知場地質素問題陀衰香港聲譽，八達通行政總裁張耀堂（Sunny）都係「紅魔」忠實粉絲，唔理出面啲風風雨雨，話同囝囝一齊去睇曼聯，呢個動力，令佢做嘢特別開心添。
呢排落咁多雨，口頭禪話齋「打波先嚟落雨」，超掃興，Sunny話都好擔心大球場嘅狀況會影響紅魔賽事，絲絲就撲唔到飛，如果可以好似Sunny咁，望吓曼聯球員嘅風釆，已經心滿意足喇！
八達通Reader駁埋電腦
撲唔到飛睇大賽，皆因絲絲係「月光族」，成日都唔知啲錢使咗去邊，Sunny即刻食住上，介紹絲絲用八達通嘅PC Reader，只要將個讀卡器連接個人電腦，就可以見到最近十次交易嘅日期、時間同金額，Sunny仲講笑咁話：「有咗PC Reader就可以用嚟check吓畀外傭買嘢嘅八達通，同埋用嚟睇吓小朋友嘅支出習慣」。