絲絲講場：新地物業唔收租撐慈善
新地（00016）參與好多善事，最近一次同業務有關。新地主席兼董事總經理郭炳聯最近就應承「願望成真基金」，畀佢哋免費租用旗下一個位於觀塘嘅物業，設立自己嘅獨立辦公室！新地嘅業務重點係物業發展，用呢個方法行善，啱晒身份。
支援「願望成真基金」
「基金」運作咗15年，主要協助患有重病嘅小朋友達成願望，例如去外國旅行、同偶像見面，至今已為超過1,400名兒童實現願望。點解會用呢個形式支援「基金」？事緣郭炳聯同「基金」董事張正甫兩個都鍾意打網球，早前打波嗰陣得悉「基金」物色緊新會址，就即刻拍心口應承免費提供會址。
書籍教材鼓勵病童
早幾日五個受助小朋友同家人，去咗新地總部參觀，郭炳聯親自招呼，期間佢大讚5歲嘅銘惠聰明可愛，臉上經常掛住樂天嘅笑容，好難想像佢年紀小小就曾經因為做手術，而要住喺醫院超過一年咁耐！為咗令已經好多年無去過海邊嘅銘惠，感受大自然嘅氣息，郭炳聯更即席以大自然活動教材向銘惠介紹海洋生態，認真愛心爆棚！佢仲話聽到病童家長分享佢哋對抗癌魔嘅經歷而深受感動添！
郭炳聯更送上精美嘅環保學習教材同埋勵志書籍，鼓勵兒童及家人繼續積極面對人生，受助兒童亦送上親手製作嘅圖畫作品，感謝新地嘅支持與鼓勵。
余詩韻