期指觀瀾：穿21703開倉追沽
真係唔到你唔服，日本股市昨重挫3.3%，滬綜指亦跌34點至1,976點，收市價計是三個星期低位，偏偏大戶要在結算前力托港股，在成交唔多，沽壓有限下，偏偏又毫無費力的使港股可以力抗淡風，僅跌118點，收報21,850點。
結算之後開大定開細，會否出現結算後追跌情況？觀乎昨日沽空成交增加至62.8億元，比上周五升25.8%，沽空佔成交比例由11.24%升至14.91%，看來大戶的確有所部署，預備一旦市況追補外圍跌幅的可能性。
昨日早市如果追勢，肯定連踩幾塊蕉皮，八月期指開21,850點，隨即被好友推上21,868點見頂，九時四十五分左右，已推落即市低位21,703點，之後再反彈，仲升穿埋21,868點高位，去到21,900點，以為好友控制大局，但十時半之後，全日好淡雙方好似失去入市興趣一樣，在開市時段的這個波幅之間上落，直到收市。
今日七月期指結算，到底係咪真係好友大戶死撐到收市，相信今日上午結算平均價有足夠樣本後，個市係龍係蛇會見真章，如果跌穿21,703點，筆者會開淡倉追沽，期指先回試21,400至21,450點之間的支持機會唔細。
John Mullen