好多大公司都有自己嘅吉祥物，就好似小米科技嘅小米兔同騰訊（00700）嘅企鵝咁，貪佢哋有代表性之餘就連宣傳都容易啲呀！尋日絲絲就收到小米公司嘅邀請函，邀請函以紅色做底色，入面嘅小米兔同騰訊企鵝搭晒膊頭，下面仲寫住「七月三十日，小米騰訊有喜事兒」添，直頭好似結婚請帖咁呀！
其實小米同騰訊嘅合作傳咗好耐啦！近排又有傳聞話騰訊會對小米投資20億美元，不過小米嘅「掌門人」雷軍同黎萬強都否認咗！絲絲聽講黎萬強仲話，兩間公司淨係產品上有合作！不過絲絲身邊好多朋友都奇怪，點解嚟緊嘅發布會，會喺北京嘅金山軟件（03888）度召開呢？
其實小米、騰訊同金山軟件嘅關係真係千絲萬縷，事關小米嘅「掌門人」雷軍同時都係金山軟件嘅董事長，而騰訊又有金山12.7%嘅股份！絲絲相信今次合作之後，三間公司嘅關係一定會愈嚟愈好呀！
講開又講，騰訊最近聯同美國硅谷嘅超級天使基金明星YC、Khosla Venture等等，以創投基金形式入股一間醫療籌款平台Watsi，首輪融資金額120萬美元（約936萬港元）。今次參投背後幾有意思，因為投資嘅Watsi係一家非牟利公司，Watsi嘅平台上載一個個需要社會幫助嘅病人嘅個人檔案，善心人士可以透過PayPal同信用卡向病人捐款。今次join埋美國嘅天使基金一齊入股Watsi背後目的係想將Watsi呢類非牟利嘅醫療平台引入中國，係咪好有意義呢？
余詩韻