絲絲講場：張一鳴闖房託望翻身

香港嘅基金界猛人張一鳴（Derek）今年七月正式同自己有份創立嘅基金Neutron Pacific講拜拜，過檔去開元產託（01275）做房託管理人。Derek坦言，過去兩年創業做芬佬係揀錯咗，依家希望為自己「止蝕」，重新起步。不過有人就笑佢，芬佬搞房託得唔得o架？

Derek自辯時講，唔覺得自己入開元就要做酒店人，反而覺得係做資本管理，仲話香港好多人都將房託同物業混為一談，以為房託係磚頭，但其實房託係金融產品就真。佢作為管理人，目的就係收租同埋保持增長，根本同管理私募基金差唔多。

佢更加講笑咁講，話八個月前完全唔識開元呢個酒店品牌，但公司上年搵佢做上市顧問時，請佢親身試住旗下酒店，一住就當堂令佢有「嘩！」一聲嘅感覺，話估唔到大陸品牌都可以有五星級嘅服務，覺得呢隻嘢有前途。最後Derek幫佢搞上市不特止，仲加入埋呢隻房託，都算係因緣際會。

至於以前檔基金，佢就有啲唏噓咁講，話過去幾年市況差，好難集資，「要低買高賣，冇得睇投資因素，而係估伯南克、李克強幾時會講乜，仲要早過晒全世界估中先有用，同賭大細無分別，我唔係鍾意做呢啲嘢囉。」

咁絲絲就祝願Derek重新出發會有好表現啦！

余詩韻