期指觀瀾：好友明顯佔上風

昨日早市，滙豐中國編制的七月製造業指數跌到近一年低位，得47.7，較分析員預期低0.5個百分點，恒指上午一度跌逾百點，滬綜指亦急升後回吐，跌10點收報2,033點。不過，昨日好友趁在三點A股收市後，加上港股成交疏落，最後一小時逐步將指數推上，令港股成功以近高位收市，報21,968點升53點。

昨日恒指及期指波幅有限，大市經過前日急升近500點後，逼近0.618的反彈阻力21,951點水平，好淡雙方先呈拉鋸，睇定形勢再部署的心態是可以理解，亦係昨日主板成交額大幅減少四分一至498億元的主因，沽空佔主板成交比例繼續高企，由前日10.18%升至11.03%。

外圍市況仍強

雖然港股低成交，但歐美市況強勢依然，正為本月大獲全勝的好友，營造了進一步炒上條件，尤其見周二港股挾高近500點後，七月期指的未平倉合約並無減少，反而由9.51萬張，上升至9.69萬張，淡友唔認輸之外，或多或少見到儲好倉的大戶似乎有玩到結算的傾向。

John Mullen