Market Insight：鐵路股勿太進取

唔知到看官睇住4%通脹有乜感覺，相信唔少打工仔，過去一年收入未必有4%增長，即係追唔上物價。若閣下並非「月光族」，若於滙豐銀行有超過一百萬元大額定期存款，一年利息0.2厘，換句話揸住一百萬唔洗，存入銀行，一年之後購買力唔見咗三萬八，存錢入銀行等於個個月貶值三千幾，都咪話唔恐怖，亦難怪分得雞碎咁多的iBond（04218），都咁鬼搶手。

古勝身邊一班精於投資的老友，最近都叫晒救命，尤其五月聯儲局話要作好退市部署之後，債券漫長牛市有迹象告一段落，於五、六月急跌，唔少債券基金上半年累積升幅經已跌番出去，去私人銀行開戶，借平錢炒高息債的熱潮近日明顯冷卻，高息股亦變得一池死水。

古勝冇點你

萬里長空

追逐回報難度極高

另外，傳統港人鍾情買磚頭收租抗通脹，也因為政府連番出辣招，SSD、DSD令買樓成本急升，收租回報期變得更長，再唔划算。

港股更不消提，中港經濟進一步「融合」加埋恒指愈來愈有中國色彩，港股同A股一樣終日望天打卦，等中央政府政策打救。最近收到唔少大型地產中介公司的宣傳電郵，集中推銷美國物業，主打係租務回報閒閒哋有7厘以上，部分中部地區更達雙位數字，但要去一個「萬稅」國家隔山買牛，真係唔敢亂向大家介紹，總之今時今日要為這至少4%回報打拚，認真唔容易。

講番個市，前日就李克強總理「保七」的定調，報復式勁升近五百點後，A股因為滙豐中國的七月份PMI跌到47.7，創十一個月新低而腳軟，港股卻係依然故我，昨再升53點報21,968點，七月期指由上個月轉倉高峰的20,200至20,400點，挾到昨日高位21,995點。儘管千幾點在手，好友大戶看來仲係得勢不饒人，結算前要殺到盡。

市場瞄準「保七」主題

有中資行揣測，李總的「保七」主題包括「擴大消費」及「增加投資」，兩隻自六月開始無補貼政策支持的家電股，終於見死貓彈，TCL多媒體（01070）及創維數碼（00751）分別升10.1及7.1%。中央要緩解水泥、鋼鐵嚴重產能過剩，唔走回頭路去大搞基建及鐵路真係無乜可能。

內地媒體話鐵路投融資體制改革方案，會在九月底上報國務院，今年年底前出台。孰真孰假？真係無人知，但鐵路股愈升愈有，中國鐵建（01186）、中國中鐵（00390）、中國南車（01766）及南車時代（03898）分別上升2.4%、3.4%、2.1%及4.3%，月中低位至今，四股累積升幅達34.5%、34%、28%及42.4%，真係發市當三年。

以中鐵建為例，今年預期市盈率彈番上8.3倍，以未來三年平均一成左右增長，估值仲算合理，消息配合短期再升一至一成五升幅未嘗不可，但睇落最大一隻雞可能已經在過去三星期走咗。

小米高估值同阿里巴巴集團籌備上市的消息，繼續利好IT股氣氛，另亦不乏其他板塊有政策消息支持，就如乳業股，近日內地盛傳工信部將於下月初公布乳業兼併重組細則，包括在財政、稅收、金融等政策範疇扶持建設大型乳企。

蒙牛繼續做大做強

理論上，已泊中糧大碼頭的蒙牛乳業（02319），有條件成為國策重點扶持的大型乳企，近年已先後增持現代牧業（01117）及全購雅士利（01230），相信未來仍會尋求併購對象。

股價方面，蒙牛今年五月以來打破逾年悶局，抽穿24至25元阻力區頭也不回，昨日再創52周高位31.85元。如無意外，今年盈利可重拾升軌，現價一三及一四年度預測市盈率分別為27倍及21倍，理論上已屆合理水平，但若然在國策支持下提速併購，加快整體增長步伐，則估值仍具上調空間，未持貨的話可待短期調整在28至30元水平再睇位上車。

古勝