自從「手指」（USB）誕生之後，基本上無咩人再用磁碟（Floppy Disk），近日網上流傳中銀香港（02388）寄咗隻磁碟畀客戶，查證咗之後，發現原來係中銀保誠信託用隻磁碟寄個MPF供款軟件畀客戶！
最近有人收到一隻容量1.44MB嘅磁碟，仲話客戶資料已經儲存在內。幾經查證，呢隻磁碟源自強積金服務供應商中銀保誠信託。不過，絲絲就覺得事有蹺蹊，中銀保誠信託明明係首間營運商推出手機應用程式，無理由時光倒流用番磁碟喎！
原來隻磁碟只係載住強積金供款程式，完全無涉及客戶個人資料，聽講用磁碟只係其中一個方法，中銀保誠信託多數用CD或者用電郵附加一個安裝程式寄畀客戶。至於平時嘅周年報表多數寄hard copy，客戶亦可以登入網上個人戶口度睇e-statement。
一向話大搞網上平台嘅中銀保誠信託行政總裁陳禹昌，聽到呢件事都有少少錯愕，仲話依家好少會寄磁碟畀客戶，多數都用電郵咁話喎！
余詩韻