絲絲講場：耀才現貨黃金「火辣」登場

講起呢間Disco，係主席葉茂林私人擁有嘅，舊年已經盛傳話會搞上市，尋日絲絲把握機會問吓上市進度，點知葉生好口密，淨係話十畫未有一撇，咁又係，依家新股市場咁嘅樣，夾硬上都未必係好事啦！

言歸正傳，耀才推出呢個現貨黃金買賣服務，係全港首間有提供買賣張數嘅交易商，以倫敦金作交易，全日24小時運作，無交易時限，比起其他商品交易所服務有優勢，仲有四間投行合作參與報價，買賣差價低至兩毫子，但葉生就唔肯透露邊幾間，話係商業秘密，淨係話係國際性嘅外資銀行，斷估咁即係唔包括曾經係策投嘅交銀啦！

年尾做埋現貨外匯

葉生講，估計首一、兩個月每日有800張成交，依家耀才有10萬個客戶，估計有兩成會參與新服務，約兩萬人，一年後仲會增至五至六萬，呢個目標都好進取，係咪過分樂觀就真係要拭目以待喇！

葉生仲強調話新服務唔會坐盤、唔同客戶對賭，咁點賺錢呢？原來係透過報價0.05美仙溢價嚟mark up，因為投資額好細，所以佢話相信好快可以回本。佢就估金價會再跌，跌到1,000美元就橫行咁話。

近日有老牌證券行結業，近年冒起嘅耀才都大嘆證券業難撈，仲勸勉記者話唔辛苦邊得世間財咁話，可能因為咁，就另闢財路囉，遲啲仲會做埋現貨外匯，將會喺第四季推出。

余詩韻