新加坡主權財富基金淡馬錫有高層人事變動，擔任咗主席十七年嘅丹那巴南宣布八月一日退休。
咁啱淡馬錫月初先公布上年度資產破頂，成功走出金融海嘯嘅黑暗日子，丹那巴南此刻選擇引退，可以話係畫上完美句號。
七十五歲嘅丹那巴南，之前做過星展銀行同新加坡航空主席，佢見證住淡馬錫由一家揸住航空、電訊同船塢等國營企業嘅控股公司，近年蛻變成為一家國際化投資公司，依家除咗係渣打（02888）單一最大股東外，亦揸住唔少中資金融機構股份，最近一年仲入股埋西班牙石油公司Repsol。
新加坡總理李顯龍亦致函表揚丹那巴南嘅貢獻，話淡馬錫嘅資產喺佢領導下跳升咗兩倍。
接棒嘅董事局成員林文興現年六十五歲，背景同丹那巴南大同小異，曾做過政府內閣官員，亦曾擔任新加坡勞工基金組織副主席。
而淡馬錫行政總裁何晶就盛讚丹那巴南同林文興都有共同嘅特質，兩人均具備高道德操守，同埋為公眾服務嘅使命感。
外界估計，缺乏投資界背景嘅林文興，相信日常投資決定繼續由專家團隊拍板。事實上，淡馬錫未來投資方向早已確定，就係積極物色歐美投資機會，仲傾向於能源、資源、生命科技、消費同科技嘅範疇添。
余詩韻