理財創富：個市Hea晒 有乜好講

股票行經理搞活氣氛振軍心

致富證券觀塘分行經理謝少淵：「我喺證券行做咗六年，有時真係見散戶多過見阿爸阿媽！我成日都話，希望將證券行變成一個家，將散戶變成一家人，就算港股大跌市，我哋都可以互相扶持度過。依家美聯儲主席伯南克放口風話要退市，中國錢荒問題搞到內銀股跌到殘晒，港股跌多升少，唔少散戶都唔開心o架，無錢搵嘛！作為分行經理，我唔可以控制股價上落，但可以控制證券行嘅氣氛，散戶垂頭喪氣時，咁我咪撩佢哋傾偈，買啲西餅汽水畀佢哋食吓飲吓，希望可以幫補吓啲壞情緒！」

Chok市逢搬行壓力大

「其實過去一個月，環球市場動盪之餘，我哋又要搬分行，又要協助客戶抽iBond，忙到抖唔到氣，工作壓力好大。不過，好彩我有班好同事，大家分擔工作，而且啲散戶亦好乖，配合我哋嘅分行搬遷。依家我諗番轉頭，真係要多謝同事嘅幫忙，散戶嘅體諒，令辛苦嘅回憶變得美好。」

渣打認股證銷售副董事林燕玲	散戶李生	輝立証券交易員許家東

輪商加強落行傾對策

渣打認股證銷售副董事林燕玲：「以前我做財經主播，每當港股大跌市，都會收到不少散戶聽眾打電話嚟問市況或者股價升跌，雖然我哋隔住個電話，但我都感受到佢哋嘅不安同埋心急。但當時我嘅工作崗位與現在不同，同散戶嘅交流比較少，最多安慰兩句就要把時間交畀嘉賓。」

「但今天就已經不同了，轉眼間我入咗渣打工作都超過兩年，對窩輪及牛熊證已經好熟悉，現時每個禮拜，我都會落證券行同散戶交流一下市況，大家有傾有講，真係好開心。」

散戶夠搏 揀輪撈底

「回顧過去一個月，環球市況比較多壞消息，港股時升時跌，其實我都擔心落證券行講解窩輪知識時，會見到散戶愁眉苦臉，點知佢哋卻鬥志激昂，仲專門搵啲股價大跌嘅窩輪去炒。呢個現象令我好驚喜，亦發現以前我面對嘅電話世界與現實世界真係大不同，只有親身接觸散戶，先可以知道佢哋嘅投資情緒，對我嘅工作亦有好大幫忙。」

投機者改炒短線免坐貨

散戶李生：「以前炒股，我都揸好多貨o架！不過揸貨太多，投資心理壓力真係好大，亦令做功課嘅時間增加不少，好似港股收市後，夜晚返屋企又要睇埋歐美股市，搞到晚晚無覺好瞓，仲好易病添。四年前，我決定改變投資態度兼策略，由中線變為極短線，長期揸貨變為日日炒股不留貨。無論嗰日我買嘅股票係升係跌，輸錢定贏錢，我都堅守沽貨清倉。」

無懼波幅 最怕靜局

「同時我亦唔玩期指、窩輪、牛熊證，一來減輕投資風險，二來我真係睇唔到咁多嘢！不過近幾年港股好難玩，好多散戶已經唔再睇貼士炒股，佢哋意興闌珊又唔願意入市，其實都會影響我呢類極短線投機者較難沽貨！」

「好似近呢個月，美國話退市及中國鬧錢荒，講真對我無咩大影響，環球市況多啲消息出現，反而帶動港股升升跌跌，恒指有波幅，散戶先有得炒，我就最驚牛皮市，港股行悶局時，時間多到我同啲股友可以一日睇多份財經報紙o架！年初至今我個倉位贏近20%，但每月turnover（成交額）已由高峰期嘅6,000萬跌至現時2,000萬，最近兩個禮拜，我集中短炒中國海外（00688）、安徽海螺水泥（00914）及華能國際電力（00902），貪呢啲股份每日上下波幅有3%，只要我買嘅股數夠多，一隻股份賺3%已經夠晒皮喇！

交易員Call吓客做分析

輝立証券交易員許家東：「我做咗交易員接近六年，經歷過○八年金融海嘯及歐債危機，當年我面對呢啲大事件，落盤時真係會驚青。不過，經過六年時間訓練，我對盤房工作已建立起自己一套心得，例如喺大跌市時，永遠要以盤為先，分析為後。即係如果有兩個客人，一個要買貨，另一個要沽貨，我就一定會做咗沽盤先。」

淡市無謂一味靠「股」

「其實理由好簡單，大市跌緊，沽盤係幫個客人做止蝕，所以動作要夠快；相反買盤遲少少都無問題，客人甚至可以買到平貨。」

「記得一個月前，市場仲驚緊中國地方債問題，之後又話美國準備退市，嗰段時期真係少咗股票買賣盤嘅電話，不過我唔覺得咁樣代表生意少咗，因為今時今日嘅散戶好聰明，股票唔好玩，咪玩衍生工具囉，做吓對沖。作為交易員，市旺時接電話接到手軟，市淡時都有嘢做o架，咪打電話畀啲客戶，傾吓市場分析，叫佢哋試吓撈底，所以大家唔好以為交易員淨係做落盤工作，我哋都係走在最前線o架！」

股評人客觀睇市唔亂估

獨立股評人黃偉康：「做咗股評人咁多年，我發現要將呢個身份做好，真係唔容易！雖然香港嘅散戶經歷過不少大風大浪，所謂嘅街市羊嫂亦少咗好多，但散戶始終都係散戶，只要面對股市大跌，始終會驚青，失去理性而胡亂沽貨。最近我經常返內地做嘢，接觸內地散戶多咗，知道佢哋除咗炒A股，亦有參與港股買賣，因此發現內地散戶與香港散戶嘅分別係，前者炒股本金為幾百萬，後者則係幾十萬。」

「散戶咪當股評萬能」

「過去一個月，面對美國退市、內地錢荒等消息，拖累港股疲弱，令散戶嘅入市信心大受打擊。我唔知道係咪內地散戶炒股金額比較大，所以佢哋對市場資訊嘅要求好高，需要嘅係一份深度市場分析報告，唔似香港散戶齋問股市幾時升番？邊隻股份可以撈底？因此令我思考，作為股評人要對市場及散戶負責任，所以我私人方面好少買股票，參與股市程度愈低，市場分析先可以更冷靜和中立。」

「另外，我必須講嘅係，散戶不能太依賴股評人嘅股份推介，股評人並唔係萬能俠，無可能記得晒所有股份資料。如果散戶真係想要投資貼士，其實應該去問經紀，因為佢哋先係收你佣金嘅人。」

若有料報畀高妹同彩兒或有嘢問，可電郵money.biz@opg.com.hk

高妹、彩兒