期指觀瀾：結算前做落機會大
上星期港股有四日升市，不過恒指累計得85點進帳，完全係拉牛上樹。上周五恒指升17點，收報21,362點，主板成交無睇頭，得479億元，沽空金額激增四成四，去到72.8億元，可見淡友在現貨市場拋售頗為積極。
港股連日窄幅波動，七月期指未平倉合約見穩步上揚，上周四已經升至9.48萬張，比前一個星期五多了5,300張，離七月期指結算尚有七個交易日，大戶到底作何部署，很快會有答案。
技術上，七月十一、十二日，恒指即市見過21,503及21,522點，上破23,512至19,426點跌浪的0.5反彈阻力21,469點，可惜多日來未能向上企穩阻力確認破位。假如大戶趁成交弱，托住個市累積倉底，結算前開單邊搵食的話，主觀睇法，做落機會大過做上。
滬綜指自五月2,334點見頂跌至1,849點，七月十一日反彈最高見2,092點，剛好觸及0.5反彈阻力2,091點，又再腳軟，上周五率先跌破周初橫行區，兼破10及20日線，國期炒家可作參考，上周五，微利先將手上好倉先行平掉，後市要先破21,469點確認轉勢，跟住仲有重要關口，50日線21,683點，但以目前成交，要突破看來殊不容易。
John Mullen