Market Insight：資金流向 唔益中資股

上星期環球基金在債券市場錄得100億美元淨流出，股票基金錄得六個月以來最勁的197億美元淨流入，其中流入美股的創○八年六月以來最多，達170億美元，心水清的可以睇到，環球大孖沙儘管風險胃納回升。不過資金相當選擇性流晒去華爾街，對未見經濟谷底的中資股，顯然是興趣麻麻。今年中國股市已累積51.4億美元淨流出，是新興市場最傷的一員。

至於港股，連同上星期五的17點進帳，整個星期累積升85點，但連續五日成交都係得「四」字頭，減埋近半來自輪場，靠佣金過活的經紀，真係有苦自己知。

外強中乾唔樂觀

恒指成個星期困在21,205至21,460點之間，專們炒輪炒期指的即市玩家，睇怕一樣無啖好食。雖然距離七月期指結算已經時日無多，但上星期水盡鵝飛的市況下，見期指未平倉合約不跌反升，加埋周五沽空成交激增，A股亦已連跌三日破晒位，睇格局似係大暴風雨前夕的寧靜。

古勝冇點你

萬里長空

上星期五傍晚，人行宣布利率市場化改革邁出重要一步，落實包括取消貸款七折利率下限以及取消票據貼現利率管制等，本以為內銀實死無生會拖冧港股，但從當晚預託證券推算，恒指有三十幾點進帳，而新加坡外圍港期亦升80點。

依家內地人民幣貸款以基準利率以下定價的，佔總貸款唔到12%，近期錢荒，打折比例更少，既然人行向被溫總形容為暴利行業的內地銀行開第一槍，近期AH股市又草木皆兵，好消息唔升，壞消息跌凸，話就話利率市場化久聞樓梯響，而估值平到暈的內銀，或多或少亦已反映這日遲早來臨，但睇多兩日市場反應至算。

以前唔少股民話大戶托住個市散貨，但要知如今港股市值超過廿萬億港紙，大成咁，邊有得托？科學啲講，上星期個市指數成分股表現，顯然好過非指數成分股，話就話上星期港股僅周四報跌，其餘四日都升，但實質外強中乾，除周一升跌股份比例57對43，升多跌少之外，之後日日跌多過升。

國美尚未見真章

古勝所見，一來唔少大孖沙見外圍比港股好炒，都當港股提款機一樣攞錢走，再者就四圍搵藉口，掟仲有錢贏的outperformer。好似上星期外電傳蘋果公司臨時押後新一代iPhone推出日期，一堆飲蘋果奶水大的OEM及零部件生產商，即時被隊到開巷，巨騰（03336）跌7.6%，瑞聲（02018）跌5.7%，富智康（02038）跌3.2%，數落去仲未炒完嘅，得番阿里巴巴集團籌備上市帶起嘅一眾內地網股。周末見外資行報告，估呢個富巴巴估值去到900億美金（約7,020億港元），估吓估吓，尚有多少空間刺激其他網股向上？天曉得！

去年重組，加埋跟國際會計準則，合併北京市大中家用電器連鎖銷售的變動下，國美電器（00493）發盈喜，預告半年虧轉盈，上周五炒高11%，報0.79元，252球成交，好耐未見過咁大場面。按公司所指，第二季純利較首季有100%增長，首季賺7,633萬元（人民幣‧下同），即第二季純利1.52億元以上，半年純利2.28億元，街外預測全年賺4.55億元，中期完成一半。

不過，估計六月開始無節能家電補貼，第三季同店銷售增長有可能放緩，相信到時先至會見到真章。但姑勿論點，依家國美市帳率得番0.77倍，同五年平均2.2倍一比，得番三分之一多少少，或者有機會上去試一試0.9至0.95港元阻力位。

水務股分注收集

上大人定調要力挺節能環保及資訊科技行業發展，相信下半年圍繞呢兩個板塊不乏炒作題材。在節能環保股之中，水務股是相對穩陣的選擇，事關現成兩大龍頭──北控水務（00371）以及光大國際（00257）都有實力控股股東撐場，營運基礎及業務模式已相對成熟，未來可以藉上市融資便利加快併購步伐，最近北控水務積極併購便是好例子。順應國策向來是投資中資股的致勝之道，環保水務股中長線可以分注收集。

另外，近日市況淡靜、成交薄弱，鑊鏟友轉玩仙股及毫子股，其中有賣殼疑雲的寰宇國際（01046），股價自高位回吐超過三成，料調整接近尾聲，投資者不妨（目及）實。

古勝