開卷唔只有益，仲可以好有趣，尤其現今科技發達，所以今年新地（00016）推動閱讀文化，都贊助書展大搞3D展覽，連中移香港都趁機推電子書服務計劃，佢哋嘅董事兼CEO李帆風尋日仲身體力行現身書展添！
新地鼓勵閱讀計劃浪接浪，今年再次贊助近千二名基層學生參與年度書壇盛事，又全力支持由貿發局主辦嘅敦煌莫高窟3D展覽，用新媒體解構古代文明，透過莫高窟嘅激光掃描數據、數千張實景高清照片，加上虛擬實景技術後期製作，令書迷恍如身處敦煌莫高窟中。新地副董事總經理雷霆都話，一連串活動都係希望學生趁機開闊眼界。
雷霆仲同絲絲講，自己不嬲都鍾意睇唔同人寫嘅書，但就好少睇一部書多過一次，但除咗《標竿人生》，每隔幾年重睇都會有溫故知新嘅領悟。
李帆風就力推電子書概念，皆因公司同聯合出版集團合作嘅「Mobius 電子書服務」月費計劃，將會喺今個月底推出。佢好有創意咁介紹Mobius嘅意思！絲絲見佢拎出一條紙帶，做出一個打橫咗嘅阿拉伯數字「8」、代表「無限」嘅符號！佢仲話沿住紙帶中間剪，就會發現扭轉嘅紙帶，會變成一個更大的圈，寓意電子書有好大嘅發展空間，令讀者喺有限嘅時間，吸收無限嘅知識咁話！
余詩韻