想搞啲大生意嚟做，具規模嘅公司可以上市集資，創企就可以邀請創投入股，運動員冇錢發展事業，又可以點科水？22歲嘅英國賽車手Dan Wells四年前先入行，起步比人慢，但就好有雄心壯志，相信有朝一日可進身成一級方程式（F1）車手。玩F1係好多男仔嘅夢想，Dan都唔例外，所以喺歐洲拎唔夠贊助後，就諗咗條好橋擺自己上枱籌旗。
投資者可以入股有限公司Dan Wells & Investors嘅35%股權，從而買起Dan，揸住佢35%收入嘅擁有權，當中包括底薪、花紅以及代言酬勞所得。
Dan請嚟摩根士丹利香港前執董Kingston Lai任首席財務官，大有來頭嘅Kingston強調呢隻唔係基金，而係私人有限公司，入股後要經歷禁售期，相信5年內就可以有股息回報。
Dan山長水遠飛嚟亞洲，希望喺區內籌到475萬美元（約3,705萬港元），之後可以去日本繼續賽車，鋪路做F1車手，佢之前喺香港亦有出售車身廣告位，同參加宣傳搵贊助費。
余詩韻