人生有幾多個十年！今年就係龍湖地產（00960）成立二十周年，除咗一般搞吓晚宴慶祝之外，曾經做過記者嘅董事長吳亞軍，都趁住呢個機會，過吓手癮，親手寫咗封信回顧吓過去咁多年喺龍湖嘅風風雨雨，亦都鼓勵吓大家。喺呢廿年入面，靠住信念同決心，即使面對質疑，龍湖已經走向全國化，一年銷售仲擴大到四百幾億人仔喇！
絲絲睇到吳總嘅信，信中內容大致係由創業講起，「開始嗰時『我們』除咗信念，就咩都無，之後打入房地產，除咗決心，亦咩都唔識，但係『我們』謙虛咁不斷向人請教，每日工作十幾個鐘之餘仲要自學建築、基礎工程，慢慢，造出嚟嘅產品口碑愈嚟愈好，信『我們』嘅人亦都多咗」，仲話有啲業主出去打麻雀都會帶住龍湖嘅樓書，一有機會就推銷畀朋友咁話。
不過，吳總話，喺重慶發迹嘅龍湖，想成為全國性房地產企業，除咗自己，就好少人相信，但係公司堅定咁向前走，終於發展到依家20個城市。事實上，「20年 我們」就係今年嘅主題，記錄大家一同構成嘅20年，絲絲聽龍湖老友講，今晚佢哋內部就舉行20周年晚宴，仲會贈送金幣去表揚一班喺公司超過10年嘅員工咁話。
余詩韻