喺同一間公司打工10年可能已經拎到長期服務獎，工作30年已好巴閉，甚至可以升為公司嘅高層，但高盛竟然有一個工作咗80年嘅老臣子，連絲絲都忍唔住要向佢致敬！
近日高盛行政總裁布蘭克費恩喺視頻會議上讚揚一位超長期服務員工Alfred Feld！Alfred爺爺今年已經98歲，但佢仍然係高盛嘅理財大使，為年齡只有佢三分一嘅同事擔當顧問同導師。
Alfred一九三三年加入高盛，當時美國失業率仲係高達25%，佢表示自己都曾經面臨差啲被炒魷嘅境況，但都大步檻過。
多年嚟佢喺高盛私人理財業務部門工作，仲成為公司年資最長嘅員工！現時佢已經離開工作幾十載嘅紐約華爾街，搬到佛羅里達州，雖然已經無自己嘅客戶名單，但依然帶領員工做理財嘅工作。
Alfred可以話見證住華爾街嘅興衰，普通人只聽過嘅金融危機同恐慌，佢一一經歷過，難怪布蘭克費恩都讚揚佢嘅判斷力、工作經驗同歷史感無可取替！計絲絲話，高盛應該印幾百個Alfred人形紙牌放喺公司，等員工以佢為目標，努力服務客戶！