絲絲講場：肖鋼滿頭白髮為A股
國務院前兩日召開全國小微企業金融服務經驗交流電視電話會議，連近排好少公開露面嘅中證監主席肖鋼都有出席，不過相比於佢對股市嘅官式表態，今次更加吸引小股民注意力嘅係肖主席兩鬢嘅白髮。
有散戶經過細心觀察，發現只不過短短幾個月，肖鋼唔止頭髮由黑變白，連眼神都由之前嘅犀利、霸氣，變成迷茫同躊躇，可見喺內地，中證監主席嘅日子就同足協主席一樣，都唔多好過。
上任數月人都老咗
自從三月中接任中證監主席個位後，肖鋼就冇咩出席過公開場合，上個月底嘅陸家嘴論壇，佢更加打破慣例，成為唯一缺席嘅「一行三會」掌門人，所以星期一嘅電視電話會議可以話係佢四個月來嘅首次公開亮相，估唔到今次最引人注意嘅係佢嘅一頭白髮。有網民即時喺微博張貼肖鋼入主中證監前後嘅相片，感嘆不過幾個月時間就老咗咁多，仲為此賦詩一首「A股跌不休，肖主席白了頭。惹不起公司、管不了機構，愁、愁、愁！」
不過，祖國魚缸唔爭氣，小股民始終怨氣難平。有散戶抱怨呢幾個月見到自己股票帳戶大縮水，頭髮白得比肖主席更加嚴重。但都有小股民話，近排中證監都出咗唔少新政策，肖鋼可能係忙到唔得閒去染頭髮，話晒佢都係新官上任，大家不妨畀多少少時間佢，可能「明天會更好」。