絲絲講場：李寧痛失「中國500強」
絲絲每年都會留意由《財富》雜誌網站所公布嘅世界500強企業，繼前排公布咗世界500強企業嘅名單之後，尋日又公布埋中國500強企業，按佢哋嘅營業收入排名，今年排頭兩位嘅公司仍然都係中石化（00386）同中石油（00857）！不過有人歡喜有人愁，今年運動品牌李寧（02331）就被踢出局呀！
「石油雙雄」入全球五甲
有「石油雙雄」之稱嘅中石化同埋中石油唔單止蟬聯第一、第二位，而且佢哋嘅營業收入重遠遠咁拋離其他公司。根據《財富》雜誌網嘅統計中石化舊年嘅營業收入有成27,860.45億元（人民幣‧下同），唔單止係中國第一，重喺世界排行第四；而中石油都唔弱，營業收入以21,952.96億元，排全中國第二，世界排名第五。雖然中國建築（03311）由舊年嘅第四位上升到第三位，擊敗原第三位嘅中移（00941）嘅5,604.13億元，但係佢嘅營業收入亦只有5,715.16億元，比起「石油雙雄」重差好遠喎！
雖然入到《財富》雜誌網嘅企業500強已經好巴閉，不過絲絲發現，中國500強企業入面有接近十分一公司都錄得虧損，其中中遠洋（01919）就以蝕咗95.59億元，成為蝕得最嚴重嘅公司！