絲絲講場：蔡爾全幫恒生搞旺私銀

永隆銀行前按揭及私人貸款中心主管蔡爾全（Robbie）離開咗舊公司之後，抖咗幾個月，終於走返入華資行，絲絲收到風，恒生（00011）內部已經出晒通告話佢加盟。絲絲問過恒生發言人證實，Robbie已經喺佢哋私人銀行部門返緊工，負責業務拓展。

至於永隆銀行前司庫鄺國榮，據聞就落戶台資行，出任富邦香港高級副總裁兼金融市場部主管。

其實金融海嘯至今咁多年，銀行受嚴格監管要求，賣投資產品仍然唔容易，但係家陣本港好多富戶嘅投資信心都恢復番，梗係唔可以錯過呢個商機，銀行愈嚟愈着力發展財富管理，恒生銀行私人銀行及信託服務主管陸庭龍（Alan），都係一○年由投資服務轉去私人銀行發展，依家仲有Robbie一齊拓展業務。

雖然私人銀行商機大，但係專業要求更高，銀行界籌組私人銀行嘅業界組織亦進行得如火如荼。Robbie家陣轉做私人銀行，同樣又要跑數，又要睇實業務準備推出嘅專業框架，睇嚟Robbie嚟緊有排忙，工作量應該唔少得過之前應付按揭戰。