聯儲局主席伯南克嘅任期仲有半年就屆滿，早前有消息話佢無意尋求連任，令近排外界對下任主席人選有愈嚟愈多嘅揣測，上個禮拜就不約而同有多個報道話，前財長薩默斯對個位好有興趣兼好積極部署。不過英國賭博網站Paddy Power最新開出嘅盤口顯示，副主席耶倫依然係大熱門，賠率只係四賠一，拋離次熱門嘅前副主席費格遜，賠率一賠五，之後先輪到二賠十一嘅薩默斯。
薩默斯對聯儲局主席寶座流晒口水幾乎係人都知，據講，佢早喺一○年就同奧巴馬提過想取代伯南克，但最終不了了之，之後佢離開白宮返哈佛教書。根據法例，聯儲局主席係由美國總統提名，之後需由參議院通過確認程序，而過去主席人選往往係總統啲友好人士，呢方面對耶倫好不利，加上過去未曾有副主席成功「坐正」紀錄。相反，有報道話薩默斯離開白宮顧問之後，仍然同奧巴馬有不少聯絡。
不過，薩默斯畀外界印象麻麻，雖然佢嘅學術同財金經驗毋庸置疑，但包拗頸嘅性格同埋經常失言得罪人就令佢減晒分，亦有批評話佢同華爾街關係太過密切，亦有份喺九十年代促成放寬銀行監管同阻止立法監管場外衍生工具市場，種下咗金融海嘯禍根，難怪連賭博網站都對佢睇低一線。
余詩韻