期指觀瀾：短線向上機會較大
周一、二港股的即市低位，分別去到21,205及21,209點就行人止步，是否意味指數已完成回補21,044至21,177點裂口，好友試完低位支持，整裝待發？
如果唔睇咁弱的成交，或者昨日午後筆者經已入市開好倉，主板成交稍高於周一，去到484億元，但相比上星期升市近730億元交投，未免縮得太勁，是意味市況沽壓唔多？筆者無法找到答案。
再睇未平倉數字變化，上周初七月期指在20,500點樓下，當時未平倉合約9.31萬張，是轉倉後高位，到上周四、五大市挾上21,500點樓上，未平倉合約反而回落，見周一期指低收21,215點，當日未平倉合約回升至9.16萬張，昨日未平倉合約9.29萬張，唔排除經過三日整固後，大戶已經累積足夠倉底，港股短期會再出現較大動力向上或者向下突破。
後市摸唔透，可是五月至今，港股跟隨A股走勢，滬綜指過去三日即市都試過2,036至2,038點水平，正好是2,334至1,849點跌浪的0.382反彈阻力位，連番測試後，似乎有機會向0.5的2,091點方向推進，有機會帶起港股，今日會以三分一注碼開好倉，以恒指收市企在21,044點作為持貨條件。
John Mullen