Market Insight：奶粉股借勢發圍

自問無能力分析官方數據有幾多水分，事實近期鋪天蓋地的經濟壞消息湧現，中港股市未有再探底的趨勢，股市向來走在實體經濟之先，或者已經把不利因素反映得七七八八，但轉角位出現前，牛皮悶局可能要持續一段時間。

昨日29隻股份創52周新高，僅9隻創新低，有消息又有成交配合的新高股，包括半新股擎天軟件（01297）、蒙牛乳業（02319）、世達科技（01282）、青島啤酒（00168）、龍源電力（00916）同埋安踏（02020），不能不提係基金大球場騰訊（00700），昨見過331.6元上市新高，成交19.4億元，一隻股票佔大市成交近4%，揭示阿里巴巴集團上市概念勢不可當的潛台詞之外，大市真係無乜炒作故事。

同是內地網股龍頭，百度（BAIDU）及新浪網（SINA）在華爾街今年得1.3%及14.2%升幅，反觀超過6,000億市值嘅騰訊，今年累升了33%，莫非連股票都係物離鄉賤？

古勝冇點你 2013/07/17

萬里長空

內容供應商或落鑊

短期大市焦點，是今晚香港時間八點半開始，聯儲局主席伯南克，在美國眾議院金融服務委員會提供證詞，五月伯老暗示退市，七月中又嚟一個彈弓手，話美國經濟需要繼續寬鬆的貨幣政策支持，即使失業率落到6.5%都唔一定要立即加息，神又係佢，鬼又係佢，今晚又睇佢開大定開細。

上面提過嘅百度，剛以10.9億美元（約84.6億港元）向近排股價炒到出煙的網龍（00777），收購手上最值錢的「91無線」的57.41%股權。查實近期賓架界已盛傳網龍搭通投行，分拆這個中國最大Apps store上市，突然殺出個程咬金，仲係「現兜兜」買，反而引發股價人踩人，急挫21.1%報19.04元，可見唔少炒家因為阿里巴巴索價愈來愈高「諗大咗」。

百度於三個月之內，先買手機電視服務商PPS，再掃「91無線」，無疑係為內地流動通訊行業進入4G前做部署，港股裏面唔少真偽內地手機內容供應商，或會趁火打劫炒番轉都唔定。

蒙牛龍頭地位穩固

蒙牛昨日股東特別大會，正式通過收購雅士利（01230）的建議，股價急升5.2%報30.85元。睇股價圖，上次蒙牛股價在「三字頭」，經已是「三聚氰胺」事件之前，差不多五年。上半年，內地市民可支配收入及零售銷售增幅令人失望，牌面計無乜理由捧零售消費類股，偏偏今年蒙牛一枝獨秀，股價累積升近四成。

古勝已唔止一次提到，蒙牛得中糧集團入主變身半隻國企，短短幾個月，引入外資股東達能，收購現代牧業（01117）穩定上游供應，再吞埋雅士利更徹底地進入嬰兒奶粉市場，後面兩宗交易出價唔算平，對即時每股盈利拉動作用好低，但有利鞏固蒙牛的乳業巨頭地位。

芬佬睇番毒奶事件前，蒙牛係一隻估值40倍PE樓上的龍頭，依家來一次大規模re-rating（重估）。但今時唔同往日，中資股估值比五年前已大平賣，上番40倍PE樓上看來機會唔大，講到底30元心理關口破咗，較樂觀大行睇緊35元左右（31.3倍PE），看來達標機會存在。

體育用品股炒復甦

體育用品股炒復甦概念，其中龍頭安踏最威水，高位見過8.74元，最後收報8.49元，升6.7%，李寧（02331）亦唔輸蝕，同升6.7%；其他如匹克（01968）、特步國際（01368）及中國動向（03818）升幅介乎1至4%。體育用品股曾經風光一時，但經歷了瘋狂擴張零售網絡之下，普遍面對銷售增長放緩及庫存高企的問題。而今年《財富》中國五百強排行榜，李寧便無緣入榜。

過去兩年行業痛定思痛，着手清理庫存及削減零售點，鞏固品牌業務基礎，相信今年業績會開始見到初步回穩迹象，但較明顯的復甦最快可能要在明年上半年才出現。股市表現往往走先經濟實體六至九個月，在今年下半年開始炒作行業復甦亦非毫無道理，但穩陣起見，選股宜從龍頭入手，安踏與李寧，二選一的話，古勝傾向選擇作風較穩健的安踏。

古勝