本港金融界近年不斷加強監管，最近證監會就提出《有關修訂專業投資者制度及客戶協議規定的諮詢文件的建議》，由於任何持牌法團必須履行新要求，惹嚟業界大為不滿，批評新建議會增加經紀被索償嘅風險，業界今日就拉大隊，喺立法會宣洩不滿，近年成日同行家唱反調嘅耀才證券（01428），又再一次唱反調。
證監會提出嘅新修訂，最受經紀關注嘅係「合適性規定納入客戶協議內」、客戶協議不應載有與《操守準則》牴觸嘅條款，業界議論紛紛，認為新規例內容含糊，更重要係擔心經紀失去免責條款嘅保障。代表金融服務界嘅立法會議員張華峰今日會聯同九個業界代表出席公聽會，以宣洩不滿的反對聲音。
耀才就大唱反調，絲絲聽耀才公關姐姐講，並唔係要同業界對着幹，只係由於本港作為國際金融中心，係需要因時制宜，制訂更切合市場環境嘅規則，做法好啱，就算監管機構唔提出，公司都要做內部監控及檢討。
佢哋仲話，咁樣做唔單止可以吸引更多投資者、海外公司嚟香港投資，仲可以避免咗雷曼事件同金融海嘯嘅發生，達致win win雙贏嘅局面。立法會今日嘅火花有幾厲害，就拭目以待喇。
余詩韻