絲絲講場：亞企工資貧富全球最懸殊

貧富懸殊問題，個個地方都有，原來地區同地區之間，都有好大分別。由曦士管理顧問公司做嘅報告，分析咗全球多個地區嘅工資水平，好有參考價值，以中層管理人員同一般員工工資差異計，亞洲係咁多個市場入面，差異最大嘅地方！

曦士嘅報告就話，喺亞洲，公司管理層人工同一般辦公室員工嘅人工差成14倍，比中東嘅11.9倍、中、南美洲嘅10.2倍更加懸殊。而相比起歐美，情況就更加嚴重啦，事關連出名人工高、福利好嘅北美洲同歐洲只不過係3.5倍同2.9倍！

報告仲好詳細咁比較部分大城市管理層同普通員工嘅工資差異，上海、印度德里、北京嘅差異好大，分別係18.5、18.3同18倍！雖然曦士嘅分析就指，管理層嘅經驗對新興市場嚟講好重要，所以人工先會咁高！不過絲絲仍然覺得好誇張，因為全球嘅平均水平只不過係8.4倍咋！

余詩韻