絲絲講場：中學生都發「上車」夢
近期唔少有關財富管理嘅市場調查，都話擁有物業係好多人嘅夢想，皆因買樓先至可以為自己嘅財富增值，政府出招後，樓市冇乜點跌，更加助長呢個想法，呢個夢想仲已經蔓延至中學生添，樓市如果繼續癲，遲啲可能連小學生嘅「我的志願」，都係想做業主！
僅14%信炒股有錢途
花旗集團今年問咗8,000個中學生，46.15%認為買樓係累積財富最佳工具，仲勁過外幣，不過呢幾年股市表現咁差，得番14%中學生認為係累積財富好工具，仲衰過揸港紙現金。
絲絲睇完個調查報告，明白到班中學生真係幾貼市，仲算係幾有遠見，超過六成中學生投資理財，係為咗長遠咁令財富增值同為未來計劃做打算，兩成就為咗賺快錢。
七成學生呻「長期糧尾」
花旗香港及澳門區行長盧韋柏話好開心，因為中學生年紀輕輕就知道理財好重要，仲要識得根據依家嘅經濟形勢去做投資決定添。
絲絲見近70%學生話面對入不敷支嘅問題，其中55%會節衣縮食等「出糧」，即係等下期零用錢，細個就感受「長期糧尾」都係好事，俗語話齋「千金難買少年窮」。
余詩韻