93年國企湧港造就投行黃金期
CVC私募基金董事合夥人兼大中華區主席梁伯韜說：「紅籌股同B股初開始時，美國投資銀行都未嚟香港，覺得香港市場太細，真正嚟香港是九三年有大型國企上市之後。九三年前差唔多係百富勤獨市，仲有本港或英資等，美國投行嚟咗，帶動基金公司、基金經理、分析員等其他配套，帶旺好多行業。香港投行黃金時期是由九三年開始！」
他又說：「九十年代初上交所同深交所想引入外資，但外資無信心，所以我搞紅籌，利用海外架構將中國企業上市。九二年第一間紅籌股上市後，H股開始醞釀。」
梁伯韜又表示：「當時聯交所主席李業廣睇得好啱，既然紅籌是一條渠道，但中國發展要由內地成立企業直接在海外發行股票，我當時係聯交所上市委員會委員，有參與研究H股。」
近年內企上市已產生一些變化，「國企好講關係、手段，與領導人稔熟或找太子黨容易有生意，我以前出道係講實力，與客戶係信賴顧問（trusted advisor）關係，現時是短線交易為目標。」
慨嘆國企常轉領導
他續說：「國企老闆五、七年轉一次，唔似香港公司老闆係大股東，會有二、三十年關係。（國企老闆）一轉又要重新建立關係，真係好攰，國企管理層無延續性，下一步目標係升官。」他認為，投行已變質，○六年他覺得美資投行正重蹈九七年亞洲金融風暴犯的錯，「投行做咗對沖基金，自己賭埋一份」，因此○六年他離開投行行業，轉為從事私募基金。