紅籌之父睇淡H股

梁伯韜接受本報專訪時表示，H股已「愈來愈難做」，因為大型國企已愈來愈少，現時國資委只剩約五、六十間央企，「每間大行都是爭取大型國企上市，競爭白熱化，俗稱elephant hunting，好似打獵咁！IPO（首次公開發售）點可能有十幾個帳簿管理人，以前最多只有兩、三間。」

愈多包銷商反而愈弊

他又表示，國企老總為成功將企業上市，但又不太熟悉資本市場，以為愈多包銷商愈好，「諗住夾手夾腳抬起佢上市，又諗住畀你（投行）入來做包銷，要幫我（企業）找基礎投資者或者硬包銷，卒之有十幾間做帳簿管理人，反而有反效果，唔係多就賣到（股），反而仲會打交！唔敢同個客（企業）講真話，怕被人（其他包銷商）篤，只有講假話。

經濟放緩 基金轉保守

他又說：「本來企業值10倍PE（市盈率），為咗爭生意，講到15、20倍，根本超越市場承受，最後推出時15倍去不到，最多妥協降到12倍，但都係偏高，推出都係死，投資者輸咗錢就唔再嚟。」梁伯韜笑言：「十幾間做唔到又唔使自己孭飛，大把人陪！但得兩、三間就冇得推搪。」「一個和尚擔水食，十個和尚無水食，十幾個更加無得食，仲做得好喎添！」

除投行把關不好外，梁伯韜說，近年投資者對中資企業欠缺信心，與內地宏觀經濟有關。經濟增長放緩，企業盈利受影響，加上近年市況太波動，基金經理都不再追求「超表現」，因為分分鐘或更差，與指數表現相若，投資者已「收貨」，因此基金經理投資策略傾向保守，寧願買ETF（交易所買賣基金），非指數成分股很少會留意，即使是藍籌股，個別更不入二十大成交榜，因此近一、兩年H股陷入低潮。

阿里來港上市機會大

他又說，新股市場萎縮，雖然不至於如A股需要暫停發行，但投資者對中資企業興趣已下降，多個板塊如內銀、資源、新能源、內房、內險等表現均不好，未來只有「揀股不揀市」。H股短期要繼續面對困難與挑戰，未來一、兩年，本港新股集資額重上全球排名首三位有難度，分分鐘首五名不保。「我相信阿里巴巴來港上市機會大，但要視乎何年上市，如果不是今年，香港就難入三甲。」

（H股廿周年系列報道之二）

中資企業面對多項挑戰外憂

‧內地經濟增長放緩，企業盈利受影響

‧近年美國上市民企在企業管治及帳目發生問題，令投資者對中資企業有戒心

‧近年市況波動，基金經理投資策略傾向保守，非成分股或在指數比重不高股份不獲垂青

內患

‧上市時投資銀行定價過高，把關不好

‧國企老闆及管理層沒有延續性

記者梁慧雯報道