理財創富：孖妹S檔案︰財經書商逆市謀突破

今非昔比 擴書種搵食

羅：匯智出版主責編輯 羅國洪

彩兒：你是本港首批財經書出版人之一，當時市場風氣如何？

羅：九十年代初，港股正在起飛階段，惟市場上的財經書僅寥寥可數，只有少量純文字分析的金融書，而當時我在中華書局任職助理編輯，適逢遇上公司轉型，因緣際會下參與編製首本圖文並茂的財經書，有齊基本理論、圖表分析、程式應用等資料，令市民多了一種渠道接觸財經資訊，於九四年面世後大賣，及後我哋乘勝追擊，於九六年出版一本有關期貨及期權的工具書，儘管索價過百元，但銷情卻出乎意料的好，同樣賣出過萬本。

香港財經出版社出版人 黃仁傑 推出有關宏觀經濟的書，尤其是內地經濟趨勢的分析。

博顥出版總經理 梁偉賢 推逆境創富系列，另主攻年輕人市場，並針對近年短炒風氣。

彩兒：但受亞洲金融風暴影響，港股於九八年大瀉逾五千點，你卻選擇在此時自立門戶出版財經書，好大膽喎！

羅：股市實有起跌，雖然九八年市況甚差，影響到財經書的銷量，但當時市場冇乜競爭，對財經書的認識又不多，猶記得當年我哋推出第一本《炒輪心法》，書局仲睇錯做《妙論心法》，以為係佛經書，放在「宗教」一欄添！不過，當年我哋幾乎係獨市，只要書籍內容稍為突出，便能一枝獨秀，賣得好好，其後再推出《168股市精解》，更食正科網股熱潮，平均月賣二千本，為我哋賺到第一桶金！

中資股題材仍吸引

彩兒：你以財經書起家，但今年冇財經新書推出嘅？

羅：廿年來，財經書銷情跟着股市起伏，最好賣係九七年、○○年、○七年，均是接近全民皆股的時期，但自○八年金融海嘯爆發後，港股便浮浮沉沉，加上愈來愈多出版社加入競爭，財經書銷量已大不如前，所以我哋近年增加推出有關思考、健康等其他類型書籍，大大減少出版財經書的數量。事實上，不少金融題材已獲選用，要再發圍已不是易事，惟中資股仲有得諗，儘管近期問題多多，但將是未來港人的投資方向。

緊貼熱話 從宏觀出發

黃：香港財經出版社出版人 黃仁傑

高妹：今年市況反覆，財經書的銷量會否受影響？

黃：由於我哋唔會獨沽一味，除出版炒股書，仲有宏觀經濟的書，就好似新作《強國錢債風暴》探討內地錢荒的熱話，而該類讀者較少受市況衝擊，銷量尚算穩定，惟相對○七年好景，難免大幅下跌約六、七成！當時每本書閒閒地都賣三、四千本，但現時就好睇個別內容及作者，有些一年可賣五、六千，有些卻只能賣出數百本，差別好大！

高妹：依家嘅讀者鍾意睇甚麼類型居多呀？

黃：現時好多散戶都睇唔到方向，變相升市時唔敢追，跌市時又唔敢撈，故近年投資者較有興趣了解宏觀經濟趨勢。事實上，我哋已好少出財經分析書，因讀者水平漸高，他們會認為該類書籍唔夠深度，所以我們會搵較具經驗的作者研究經濟格局，而未來數年將會集中於中國經濟分析，因其不僅是環球經濟火車頭，亦對香港有重大影響。

趨勢偏短 取材受限

高妹：你選題時，會否遷就市況？

黃：這有困難，再好的作者也要三至六個月才可完成一本書，除非好似樓市咁升五、六年，否則只可揀一些較少時限性的題材。

高妹： 你作為金融書出版人，投資方面會否技高一籌？

黃：我同散戶一樣，都會投資物業、股票，但我會着重投資的穩健性，一定會避開衍生工具，因知道輸的機會超過九成。另早前金價大跌，曾掀起搶金熱，因部分作者有研究金價走勢，我便知道金價的跌浪才剛開始，故多多少少都會有啟示作用呀！

教打「逆境波」攻後生客

梁：博顥出版總經理 梁偉賢

高妹：你哋出版的財經書多元化，邊類最好賣？

梁：我們於○三年成立出版社，撞正港股走出沙士困境、開始回勇，當時食正恒指升浪，尤其以分析大市、揀強勢股等書籍特別受歡迎，一些金融名家推出的策略書亦大有追捧，可惜自金融海嘯後港股大瀉，不少散戶選擇偃旗息鼓，財經書銷情每況愈下，故此我哋推出《逆境創富系列》，因甚為應境，獲得不俗反應呢。另逆市可吸引新手入場低撈股票，故此我哋近年主攻80、90後，出書教佢哋投資理財，加上不少投資者轉玩即日鮮減低投資風險，相關題材均有market呀！

定價合理唔驚趕客

高妹：你有冇試過跟書中策略投資呀？

梁：早前曾出版外匯書，當時為了解匯市知識及風險，我真係專登去開戶口、跟作者策略炒匯，最終在短時間內賺咗20%，惟匯市風險高，好似買大細般講彩數，又要經常睇實市況，所以我好快就冇玩喇。

高妹：財經書定價一向較高，我哋經常去「打書釘」！

梁：財經書普遍較貴，因大部分投資者覺得有用的話，都唔會介意一百幾十元的成本，但我們的讀者多是年輕人，定價不能太高，多在一百元內。

散戶愛睇邊啲財經書？

名家策略取長補短

Elvis：我每年都會買一至兩本財經書，但今年冇買呀，只係問朋友借咗一本前i-banker出的投資書，我本來期望會揭露一些投行陰暗面，但都係講返投資心態為主。其實，我買得最多財經書係○六年，當時初入股場乜都唔識，故經常睇書進修，會涉及多個範疇，但現時已有自己的投資方式，就開始揀書睇，如參考名人投資策略，可取長補短。

「貨幣戰爭」睇通大勢

王小姐：三、四年前仍有買財經書，但近年冇買喇，因好多書都要百幾二百蚊，唔抵！我平時會留意分析環球經濟格局的書，如近期對「貨幣戰爭」這課題特別有興趣，可有助了解整個經濟趨勢，較有得着。相反坊間一些講解股市分析的書，唔夠update之外，亦較籠統！