絲絲講場：智美以古喻今體育興國
本港上市公司眾多，幾乎各行各業都有，偏偏我哋經常接觸嘅體育運動，似乎幾難搵到隻相關概念股。尋日上市嘅智美（01661），算係半隻體育股，掛牌儀式上仲別出心裁送上中國四大古代運動的銀章，寄語內地體育事業再現強國風範。
所謂中國四大古代運動，包括蹴鞠、圍棋、射箭同埋摔跤。以蹴鞠為例，國際足協喺○四年，已公開確認足球運動最先起源於中國。《戰國策》記載，早於春秋時代，蹴鞠已經喺齊國流行。而且咁啱得咁蹺，史上中國國運同「足運」都幾有關係，蹴鞠喺唐朝非常鼎盛，直至明清朝起先逐漸沒落。
公司發展猶如長跑
所以智美主席任文話體育活動效益大，確係無花無假。任總仲話相信隨住一啲小眾運動好似冰球、欖球等逐漸喺各大省市流行，中國體育發展一定會後來居上，唔輸畀歐美國家。
講開又講，任總都算係絲絲同行，佢喺中國傳媒大學畢業後，僅一年就創立智美前身智美奧成，公司主力製作汽車節目。任總坦言自己唔係做開金融，唔識評論短期股價，但公司會好似跑馬拉松咁穩步快速發展。絲絲都相信「路遙知馬力」，長線股價跑贏嘅一定會係管理得宜嘅公司。
余詩韻