絲絲講場：友邦幾「球」美金 打硬仗
本港保險業或掀新一輪龍爭虎鬥！雖然市傳李澤楷（小小超）旗下嘅保險公司，話明要喺未來嘅三至五年內打入前三甲，亦無阻行業龍頭友邦（01299）尋日正式發布數百萬美元嘅宣傳大攻勢，友邦香港及澳門首席執行官陳榮聲（Jacky）仲話唔怕競爭添，有競爭反而係好事。
較早時有消息話小小超買下ING嘅部分業務將會改名做「富衞保險」，目標係要問鼎本港保險業嘅頭三名位置。
陳榮聲：歡迎良性競爭
面對富衞嘅來勢洶洶，Jacky同絲絲講，其實咁樣反而有助市場嘅良性競爭，間接提升埋服務同產品質素，對好似絲絲呢一類有買保險嘅客仔非常有利。
佢仲話，友邦新一輪嘅攻勢會以「真生活 真夥伴」做口號，未來策略會以保障性產品為主，而成個攻勢嘅budget就用咗幾球美金，都咪話唔大堆頭呀！
謝佩蘭飲健怡可樂提神
而友邦香港及澳門市場及業務策略總經理謝佩蘭（Bonnie）就同絲絲講，為咗呢次宣傳，公司擺咗好多心機落去，期間Bonnie真係忙到不得了，佢總結心得話畀絲絲聽，自己好鍾意飲健怡可樂，因為有助提神，最緊要飲咗又唔怕肥喎！
余詩韻