筆者一直都覺得六月跌市有玩大之嫌，因每次伯南克出來講幾句說話，退市時間仲係若隱若現，市場反應已經好強烈，十年美債息飆高一厘，環球股市如坐過山車，到昨晨聯儲局公布會議紀錄，伯老又話可預見未來，高度寬鬆貨幣政策是美國經濟所需要。
言下之意，退市無咁快，又係嘅，買定個保險，因投資者都係好短視，無人想忍受短期痛苦，QE要退勢面對唔少反對聲音。
恒指周三尾市抽升，昨日高開即見21,177點，升幅持續擴大，總理李克強要求經濟增長率保下限的言論，A股踩油，滬綜指全日升3.23%，創七個月最大單日升幅，恒指午後兩點後挾到21,503點高位，最多升近600點，收市升532點，10日線升穿20日線現黃金交叉，主板成交730億元。技術上，恒指升破保力加通道頂部，成交配合，走勢似轉好，今浪由23,512點見頂到19,426點跌幅0.5反彈阻力21,469點，都終於突破。
即月期指昨高位21,513點，超標完成好倉目標，做人唔可以太貪，按計劃如願地在21,300點先行食胡，恒指下個阻力睇0.618反彈位，50日線21,857點個位要升破要更大動力，距現水平約400點。
John Mullen