Market Insight：內房可望持續反彈

伯南克演說時提出市場資金太緊張，勢必影響聯儲局維持物價穩定及促進就業的目標，第一次提出，唔會在失業率降至6.5%之後立即加息，至少等失業率維持該水平一段時間先諗。

美國債息因為憂慮收水急跌，十年期美債孳息率從低位反彈超過1厘，顯然伯南克想紓緩近期債市激烈的漣漪效應，怕金融市場融資升得太快，窒礙經濟復甦。可圈可點仲係之後嘅補充：「可見的未來，非常寬鬆貨幣政策是美國經濟所需」，對恐懼升息的投資者，真係賣晒大包。

古勝冇點你

萬里長空

美股應高處未算高

其後財經傳媒搵IMF首席經濟學家Olivier Blanchard做訪問，話佢認為美國經濟無過熱迹象，更見唔到通脹預期升溫的情況，根本唔使咁快擔心通脹。財金猛人畫公仔畫到出腸，美元低息及貨幣寬鬆政策，唔會一如極端預測九月份就殺到埋身，股市既有低息，又有經濟復甦故事可炒，睇嚟美股短期係高處未算高也。

之前炒提早退市，美元強、美債弱，幾句說話成個trend又行番轉頭，先來個修正。港股昨日報復式反彈，恒指升532點報21,437點，主板成交730億元，是近十個交易日以來最旺。技術上，恒指自23,512點見頂跌到19,426點，跌幅的0.5反彈阻力在21,469點，昨日補裂口兼到位。

緊縮政策仲有彎轉

　昨日大市的升勢，主要集中在近期超跌的中資股（水泥、煤、鐵及銅），以及炒緊七月新增貸款大鬆綁的重磅內銀股。這類股份被基金洗得就洗，已經無乜攔路虎，估計反彈較大阻力要去到21,857至21,951點，即係50日線及0.618反彈，昨日係升得急啲，但睇落至少仲有幾百點水位博吓。

中資股大升，另一主因係總理李克強在廣西主持經濟座談會，提出經濟增長及就業率定出「下限」的言論。看來領導人口硬要教訓銀行兼做長遠產業結構改善的同時，亦都投鼠忌器，怕「緊」到經濟好似鐵達尼一樣沉咗救唔番。從李總言論看來，緊縮政策唔係鐵板一塊，仲有彎轉。不過，睇到早兩日中國進出口數字，去「水分」後差到暈，令人擔心要谷亦唔係短期谷得起，與其玩幸運輪，賭中央扶持某一產業，不如諗想㩒都㩒唔住的內地樓市，近期中央再無開聲要收緊，內房股應該有得諗。

努年多年的聯想集團（00992），終於取得全球個人電腦（PC）市場的「一哥」寶座。據行業統計數據顯示，聯想在全球PC市場的佔有率已升至16.7%，取代頭號敵人惠普，穩坐全球PC市場供應商首位。受相關消息刺激，昨日其股價一度升上7.23元，收報7.15元，升3.6%，成交4.72億元。

不過，面對智能手機及平板電腦等產品興起，全球PC市場增長正在放緩，聯想取得一哥地位，冇錯是達成了一個多年任務，但接下來更艱巨的任務，是把握新興市場PC業務的優勢，加快拓展智能手機、平板電腦以及智能電視等業務，以維持中長期增長。

參考PC業務的成功經驗，聯想首要做的，是進一步提升在內地智能設備市場市佔率，鞏固絕對優勢，這可能須借助併購活動，以加快發展步伐。

聯想致力更上層樓

今年以來，聯想既已進身藍籌行列，又成為全球PC業一哥，以迎接明年二月公司上市二十周年，股價表現應值得期待。展望未來三年，估計同系即將出現的新里程碑，包括母公司實現整體上市、聯想登陸A股，及分拆成熟業務獨立上市。若聯想繼續致力提高股息率，可吸引更多大型基金長期捧場，長線投資者可留意逢低收集的機會。

古勝