絲絲知道唔少高官淡出政治舞台後，都會出席一啲演講show，搵銀之餘亦分享過來人嘅睇法，好似美國前總統克林頓同英國前首相貝理雅咁，頻頻講Talk，賺得仲多過以前打政府工！
最近又多咗一位演講新星，就係美國前財政部長蓋特納，佢單係出席三場演講就已經袋入40萬美元，即係平均每場演講值一百萬港紙，進身「百萬講者」行列！
蓋特納自一月離開奧巴馬政府之後，四月就開始佢嘅演講之途，上個月更被邀請至德意志銀行喺英國搞嘅年會，以20萬美元嘅高價，分享聯儲局嘅政策同環球經濟局勢議題，同場仲有法國前總統薩爾科齊同意大利前總理蒙蒂。
有指原來唔少私募基金公司都會互相競爭，睇下邊一個可以請到響噹噹嘅大人物做演講嘉賓，於是乎造就呢班前國家高官可以賺個滿堂紅！
絲絲覺得利用自己嘅官場經驗「發揮職場餘熱」，同後輩或者公眾分享的確唔錯，不過落台無幾耐就公開以前做官嘅點滴，難免會惹嚟閒言閒語，所以絲絲都係認為，官員退下火線應該好似日本央行前行長白川方明咁，講明至少六個月內唔會公開講以前央行嘅政策同工作事迹，專業啲嘛！