李寧（02331）主席兼靈魂人物李寧舊年夥拍TPG嘅金珍君共同執掌公司，李寧講到明以「運動員精神」重新上路，一改以往被動妥協嘅習慣，主動提出要掟20億元贊助中國男子職業籃球聯賽（CBA）同美國NBA熱火超級球星韋迪，即使外界質疑公司不斷大手筆進行改革兼豪爽贊助賽事，但李寧依然覺得物有所值。
李寧雖然至今重掌公司業務近一年，但都話自己心態上仍在調整中。
唔少投資者都擔心，李寧過去並唔多參與公司日常營運，重新執掌大局未必適應，但佢接受內地媒體訪問時，一句「係唔係企業家並唔重要，係唔係運動員才重要」，運動員嘅爭勝雄心顯露無遺。
據李寧講，公司戰略將聚焦籃球、跑步、羽毛球為三大核心運動項目，故不惜以天價成為CBA裝備贊助商，一口氣簽約五個賽季，豪畀20億元贊助費，媲美NBA嘅贊助金額，李寧睇好CBA將為內地甚具潛力嘅賽事平台，仲話贊助金額好抵。