絲絲有時喺街聽到啱聽嘅歌，但又唔知道歌名時，都會搵一個叫做Shazam嘅音樂識別app幫手，搵番首歌出嚟。最近仲聽講墨西哥億萬富豪斯利姆將會投資4,000萬美元，畀Shazam嘅開發商繼續發展呢個app添。
據絲絲所知，用家只要畀個app聽吓首歌，佢就可以辨識到首歌嘅歌名、歌手、大碟名稱等資料，仲會提供埋網址畀你買呢隻碟或者去Youtube睇MV，但點解極少沾手IT嘅斯利姆對呢個app咁有興趣？
原來做開電訊業嘅斯利姆近期將投資伸展至電視業，而Shazam希望將音樂業務擴展至電視業務，合晒斯利姆嘅脾胃，故此墨西哥富豪決意大手押注落呢家英國公司。
Shazam執行主席Andrew Fisher話，會將Shazam發展到電視領域，到時程式會連電視廣告嘅聲帶都可以辨識到，之後就會提供相關品牌嘅網站畀用家。Fisher話，計劃向英國、其他西歐國家同拉丁美洲提供呢項服務。佢仲好有信心咁話，預計一年半後電視業務嘅規模就會超過音樂嗰邊添！