上市公司商會尋日轉莊，大熱門之一嘅晶門科技（02878）非執行主席辛定華，順利當選，接替羅嘉瑞做新一屆主席。早前市場已盛傳今屆主席會係辛定華嘅「囊中物」，果然不負所望。
其實辛定華可以講係上市公司商會「老臣子」，做過上市公司商會名譽行政總裁、又做副主席。市場人士就話，辛定華做過好多上市公司嘅獨立非執董，以前又做過賓架，好熟悉上市過程，更做過上市委員會副召集人，應該夠晒經驗。
至於羅嘉瑞就轉做副主席，另一名新任副主席就係新鴻基地產（00016）執行董事陳國威。至於和黃（00013）副集團董事總經理周胡慕芳就繼續做常務副主席。
今次結果合乎預期，反而今屆常務委員會新成員有驚喜。大新銀行主席王守業新加入做常務委員會委員，另一個就係海通國際資本董事總經理徐閔，佢亦係今屆上市委員會成員。另外，原來商會有兩個委員係上市委員會委員。除咗徐閔外，另一個就係長實（00001）公司秘書楊逸芝，相信可將上市公司嘅聲音帶進上市委員會。
余詩韻