絲絲講場：張敏華教遊日兌YEN心得

日圓早前跌好多，港人湧去日本旅行，花旗環球個人銀行服務投資策略及研究部主管張敏華都去咗福岡浸溫泉，仲話當地物價平到你唔信，如果無喺好價位換日圓都唔緊要，見到匯價好可以碌卡喎！

物價點平法？佢舉例話，喺福岡食到最豪嗰餐，仲有兩位身穿和服嘅姐姐幫手烚雞，人均消費只係四百蚊港紙！佢仲教路，話如果喺日本見到匯價好，就碌住卡先；如果匯價差過你換錢個價位，就用番現金喎！

睇開匯市嘅張敏華話日圓短期內好難重返一百水平，呢三個月內hit到九十八已經好好彩。不過，佢估計，日本首相安倍晉三喺第三季或者會推新一輪經濟改革方案，日本央行又可能進一步擴大購買資產規模，屆時就會利淡日圓，日圓有機會跌至一百一十水平。

余詩韻