近排中國資金市場立立亂，但係無阻內地銀行走出去嘅步伐，建行（00939）尋日就連續宣布幾件海外大事，包括香港落實分支機構整合、台灣分行開張，建行董事長王洪章同行長張建國兵分兩路，分別喺香港同台灣出席儀式，王洪章話尋日係建行雙喜臨門嘅日子。
香港機構整合發布會，有近400個賓客參加，座上客星光熠熠，包括金管局副總裁阮國恒、建行非執董任志剛、信和置業（00083）主席黃志祥等。
其實建行唔單止架構有調整，香港買落同埋重建嘅物業，都陸續投入服務。位於九龍灣嘅建設銀行中心都揀咗尋日啟用，建行副行長龐秀生仲向大家預告埋，中環總行亦都會喺兩個月內開始啟用。
至於台北分行開張，同樣值得高興。唔講唔知，建行係繼中行（03988）同交行（03328）之後，第三家喺台灣設有分行嘅中資銀行。
余詩韻