全世界嘅證券市場，都（目及）住阿里巴巴會揀邊度上市，認真係唔憂嫁，分分鐘會睇吓邊度嘅市盈率高啲嚟決定。阿里巴巴前總裁衛哲（David）雖然離開咗公司，但都力讚阿里係好公司，市盈率定喺20至30倍都合理。
阿里情歸何處，對香港好緊要o架，正如會計師行安永所講，阿里集資額可能達千億元，如果好彩喺香港上市，可以將香港今年嘅新股集資額倍增到二千億元。
對於依家係咪阿里上市好時機，David話阿里係一間實力雄厚公司，幾時上市都no problem；參考去年第四季雅虎季績，阿里若有20至30倍市盈率亦屬合理。佢仲話，最終去邊度上市，要睇阿里定位，若果其着重「電子」呢part，美國係理想地點，相反若更倚重「商務」，咁香港應該係首選。
阿里整體上市無疑係重大里程碑，曾經係馬雲左右手嘅David卻無份參與，會唔會留下一絲遺憾呢？David就咁睇：「正如我做唔到美國總統，人總有啲嘢做唔到嘅，如果我當時唔走，依家亦都唔會做咗基金經理，睇住咁多間互聯網公司喇！人應該睇得到啲咩，總好過緬懷失去啲咩。」仲話雖然唔再係馬雲嘅商業夥伴，但雙方依然係朋友。
David喺一一年二月離職，轉戰基金界，依家係Vision Knight Capital董事長兼創始合夥人，佢話：「三十至四十歲做互聯網企業（指阿里）最開心，四十歲以後不夠年輕啦，轉做基金經理最開心。」
余詩韻