Market Insight：電力板塊 基金首選

從一些客觀條件，環球市場可能已捱過最驚濤駭浪的幾日，恒指恐慌（波幅）指數由周二高位30.18，累積回落兩成二，去到昨日23.68。十年美債息由五月初1.614厘狂挾去到周初的2.657厘見頂，連續兩日回落，目前在2.49厘水平，對美國提早退市的恐懼雪球總算穩定落嚟。在人行表明已經向銀行注入流動性之後，人民幣隔夜及一星期拆息，亦由上周高位13.44及11厘回落到5.56及6.68厘水平。

之不過恒指短短三日，由低位19,426點升到昨日高位20,713點，累積反彈1,287點或6.6%，假如過去兩日無買過，仲追唔追？確係一大難題，尤其睇埋昨日整體股份升跌比例，由前日八對二，一面倒返回五五之比，多少見到內地經濟短期展望唔樂觀，唔少投資者都抱住極短線的心態。

古勝冇點你

萬里長空

中國電力短線看好

昨日電力股整體走勢標青，一來煤炭集散地秦皇島，消息話有700萬噸煤晒緊太陽，比五月中大升29%，電廠平均煤炭庫存由15日升至23日，加埋今年雨水特多，上半年水力發電量升近11%，成個中環睇死煤價仲有排要一路向下（上星期5500KCal/kG的再跌價20元去到580元人仔一噸）；其次係，市場預期內地電力消耗下半年會掉頭回升。

早輪有外資行唔知係咪做對沖基金打手，出報告話發改委研究減電費，消息到今日為止仲係得個吹字。不過，電力股今浪由高位跌得咁誇，估計基金要撈底，都應該會係首選，其次先輪到環保能源股，當中可以留意華能新能源（00958）及大唐新能源（01798）兩隻。

華潤電力（00836）昨日升得厲害，單日抽高6.2%成為藍籌股王，收購華潤燃氣（01193）的股東會押後，古勝仍在等緊機會。煤價敏感度最高的華能國際（00902）升6.5%，反而今年水電火電收入都估有唔錯增幅的中國電力（02380），算升得少，昨日有3.3%進帳收報2.81元。睇番大前日，中國電力股價被洗到落2.41元，剛好在250日線上面剎停，將四月中累積升幅一鋪清，一三年得7.8倍PE，短期上番3至3.2元應該難度唔大。

今日半年結，睇番上半年有銀河證券（06881）及中石化煉化（02386）兩隻重磅新股上市，首五個月港集資額達356億元，按年升38.2%，連埋六月的幾隻新股，相信集資額去到380億元，按年升兩成六左右應該無走雞。另外，首五個月港股日均成交為682億元，按年升16%，睇番去年六月港股日均成交僅得452億元，近期平均都有七百億上，估計半年埋數，增幅亦應該稍高於五個月數字。

本地券商股有得諗

恒指同去年底的22,656點比較，跌緊一成，不過成交旺番，查實點都要睇番港交所（00388），可惜大孖沙怕佢買LME的收購摸頂，短期業績亦難以避免有攤薄效應。其實今年本地券商股表現真係幾唔錯，好似耀才證券（01428）以及海通國際（00665）今年股價累積升37.7%及8.4%，跑贏個市幾條街。

如果生意同大市成交同步，一三年預期市盈率好大可能落返去8至9倍左右，難怪有人已經預先炒定中期份靚靚業績，兩隻股票比較，海通派息往績相對慷慨，維持四至五成派送紀錄，唔嫌冷門的確有留意必要。

前海概念股或翻炒

深圳前海綜合規劃獲正式批覆，提出三年內投資3,800多億元人民幣，至一五年全面建成合作區基礎設施，二○年實現國內生產總值1,500億元人民幣。呢個時候出現呢個消息，實可視為中央「維穩」嘅另一舉措，魚缸炒家又可乘機留意炒作前海概念股嘅機會，如深圳國際（00152）、中集集團（02039）同招商局國際（00144）。

其中，深國股價今年以來基本上維持在0.8至1.1元水平上落，近日再次成功考驗橫行區底部支持，昨日收報0.92元，短線成交配合應該有得諗！

古勝