唔知有幾多人同絲絲一樣，去完旅行返嚟無耐又心癢癢想再飛多次呢？想去一轉平價旅行，一張廉價機票絕不可少！正當各大航空公司推出各項限量機票優惠嘅同時，香港快運航空（Hong Kong Express Airways）尋日亦宣布正式轉型為廉價航空，成為香港本土嘅廉價航空公司，睇怕無幾耐本地航空業又會再有新一輪機票劈價戰！
絲絲聽香港快運總裁楊建紅講，佢哋計劃喺今年十月下旬航班換季嘅時候，以低成本航空身份重出江湖，同姊妹公司香港航空合作提供航班，目前已訂定嘅新航線包括內地嘅昆明、重慶以及馬來西亞嘅沙巴，嚟緊會再公布更多新航線，主攻東南亞、中國、日本同韓國咁話。
雖然航空公司目前只有3架機，但到九月將會增加至5架，仲話目標五年內增加至30架。絲絲聽講香港快運嘅機票價錢比市價低三成，有望能突圍而出，絲絲一於拭目以待，等買平價機票！