絲絲講場：九建柯沛鈞揀澳門大發揮
九龍建業（00034）主席柯為湘大仔柯沛鈞（Johnson）加入咗九建嘅董事會有好幾年，絲絲聽柯為湘講，仔仔Johnson喺幾年前睇過公司中港澳三個地區嘅項目，最終揀咗去澳門發展地產，令到舊年澳門賣樓達到過百億，而今年上半年大部分銷售都係嚟自澳門，柯為湘笑晒咁話，睇嚟年輕一代比佢哋精明咁話。
34歲嘅Johnson話，依家主要負責項目嘅管理同設計，佢希望嚟緊會喺設計方面以及設施增值方面，可以比其他發展商做得優勝。話晒舊年澳門賣樓賣得咁好，柯為湘仲希望今年可以比舊年再進步啲！
柯為湘未打算退休
至於已過六十歲嘅柯為湘目前有無退休打算？佢就同絲絲話，人始終係有時限，終有一日會退落嚟。但家陣自己會繼續全力以赴，希望為股東服務，暫時未有退休計劃，不過都要未雨綢繆，Johnson加入公司，就係想佢通過學習為公司未來發展做準備。
目前九龍建業主要負責中港地產業務，而旗下保利達（00208）就主要做澳門地產，同埋其他包括香港製冰、能源嘅業務，對於時下唔少上市發展商流行分拆、重組，柯為湘話無考慮要做呢啲動作，公司主要係集中加強公司嘅業務發展，大方向係為股東爭取利益。